Azərbaycanda uçot dərəcəsi azaldılıb

2018-10-30 | İqtisadiyyat | 2549

Azərbaycan Mərkəzi Bankının (AMB) İdarə Heyəti uçot dərəcəsinin 10%-dən 9,75%-ə endirilməsi, faiz dəhlizinin yuxarı və aşağı həddinin buna müvafiq olaraq+/-2% olması barədə qərar qəbul edib.

"Report"un verdiyi xəbərə görə, bu barədə AMB-nin sədri Elman Rüstəmov bu gün keçirdiyi mətbuat konfransında məlumat verib.

Xatırladaq ki, qurumun İdarə Heyəti 12 fevral 2018-ci il tarixində uçot dərəcəsinin 15%-dən 13%-ə, faiz dəhlizinin yuxarı həddinin 18%-dən 16%-ə, aşağı həddinin isə 10%-dən 8%-ə endirilməsi, 2018-ci il aprelin 9-da uçot dərəcəsinin 13%-dən 11%-ə endirilməsi, faiz dəhlizinin yuxarı və aşağı həddinin isə +/- 3% səviyyəsində olması, 2018-ci il iyunun 14-də uçot dərəcəsinin 11%-dən 10%-ə endirilməsi, faiz dəhlizinin yuxarı və aşağı həddinin buna simmetrik diapazonda +/-2% səviyyəsində olması, 2018-ci il avqustun 1-də də eyni səviyyədə (uçot dərəcəsinin 10%, faiz dəhlizinin yuxarı həddi 12%, aşağı həddi 8%) saxlanılması barədə qərar qəbul etmişdi.

Qurum faizlərə növbəti dəfə bu ilin dekabr ayında baxacaq.

Muhasib.az saytının şərhi

Mühasiblər üçün uçot dərəcəsinin azalması aşağıdakı əməliyyatlara təsir edəcəkdir. Belə ki, vergi uçotunda AR Vergi Məcəlləsinin 110-cu maddəsinə əsasən

Gəlirdən faizlər üzrə çıxılan məbləğlərin məhdudlaşdırılması. AR Vergi Məcəlləsi, Maddə: 110.

Xaricdən alınmış borclar üzrə, habelə qarşılıqlı surətdə asılı olan şəxslərin bir-birinə ödədikləri faizlərin faktiki məbləği (hesablamalar metodundan istifadə edildikdə - ödənilməli faizlərin məbləği) faizlərin aid olduğu dövrdə eyni valyuta ilə, oxşar müddətə verilmiş banklararası kredit hərracında olan və ya hərraclar keçirilmədiyi təqdirdə AR Mərkəzi Bankının dərc etdiyi banklararası kreditlər üzrə faizlərin orta səviyyəsinin 125 faizdən artıq olmamaqla gəlirdən çıxılır.

Misal 1 iyul 2009 il tarixində müəssisə xarici bankdan 20 000 ABŞ dolları kredit almışdır. Kreditin illik faizi 15% -dir. Faizlər, kreditin verilməsi günündən etibarən hər ay hesablanır. Hesab edək ki, iyul ayında Mərkəzi Bankının dərc etdiyi banklararası kreditlər üzrə faizlərin orta səviyyəsi 10% idi, qalan aylarda isə 7%. İyul ayı üçün faizi hesablayaq: 20 000*15%*30/360 = 250 ABŞ dolları İndi isə, gəlirdən çıxılan faizin məbləğini hesablayaq. İyul ayında Mərkəzi Bankın dərc etdiyi banklararası kreditlər üzrə faizlərin orta səviyyəsi 10% idi. Deməli, gəlirdən iyul ayı üçün bu faizin 125%-ni çıxmaq olar, və ya 12,5% (10*125%). 20 000*12,5%*30/360 = 208,33 ABŞ dolları Beləliklə, iyul ayı üçün gəlirdən faizlər üzrə çıxılan məbləğ 208,33 ABŞ dolları təşkil edir. Qalan məbləğ isə, 41,67 ABŞ dolları (250-208,33) təmiz mənfəət hesabına ödənilməlidir. Qalan aylar üçün gəlirdən faizlər üzrə çıxılan məbləğlərin hesablanması eyni qaydada aparılır.

Mənbə: https://report.az/maliyye/azerbaycanda-ucot-derecesi-azaldilib/